Квадрати на постоењето

Керамика во концепт. Запис од уметничката, керамичарката Анета Попова со својата богата едноставност загатна нова поставеност на овој медиум.
Изложбата беше поставена од 12.12 – 14.12.2019

Евалуацијата и карактерот на микроструктурата на керамиката  често може да се поврзе со нанотехнологијата и тензијата во микрометри. Микроструктурата која човечкото око ја забележува со лимитираната резолуција на голо око и светлината која се рефлектира, ja создава сензацијата на доживувањето. Микроструктурата што ќе ја забележите кај авторката Анета Попова вклучува барање, откривање на микро-пори, микро-пукнатини, структури кој се создале со трагите што авторката ги детектира во врската со природата, со постоењето, и нивната врска со човекот кој остава трајни белези со своето постоење.

Ако трагата е отпечаток на се она што постои, или пак е запис на “нешто” што поминало врз некаква површина, љубопитството кај нејзе, тоа да се забележи и регистрира, а уште посуштествено да се истражува, е длабоко содржинска перцепција на која таа се посветува со суптилност.

Прецизна во својот минималистички пристап, таа е точна, јасна во изработката и обработката на трагите во керамиката. Авторката сече, притиска, ја ранува меката земја и печејќи, го фиксира фрагментот како “досие на постоењето” како што таа ќе забележи. Нежните ракописни записи се забелешки кои ќе ве воведат во формирањето на една приказна. Квадратните објекти, поставени во фриз, континуирано сугерираат, раскажуваат, ве поттикнуваат на релаксирано себе-спознавање, провокација што упатува на дијалог.

Дијана Томиќ Радевска лик. уметник и куратор на галерија “Акантус”